A nosa explotación

GalPorCel naceu no ano 2023 na parroquia de Seavia, no concello de Coristanco (A Coruña), coa ilusión de desenvolver un proxecto centrado na cría de Porco Celta e na recuperación dunha das razas máis emblemáticas de Galicia.

Detrás desta iniciativa está Antonio Moreira, gandeiro de toda a vida, que decidiu apostar por un modelo de produción baseado no respecto polos animais, o aproveitamento do medio natural e a conservación da tradición gandeira galega. A experiencia acumulada durante anos no sector serviu de base para poñer en marcha unha explotación pensada para crecer de forma sostible e responsable.

Os primeiros pasos déronse cun pequeno grupo formado por cinco femias barcinas e un macho carballiño. Dende entón, o proxecto foi evolucionando constantemente grazas ao traballo diario, á aprendizaxe continua e á dedicación dunha familia comprometida co mundo rural.

Na actualidade, GalPorCel conta con arredor de 200 animais e unha superficie de traballo próxima ás 6 hectáreas. Ademais das fincas destinadas ao pastoreo, cultivamos parte dos alimentos que forman a base da alimentación dos nosos porcos, mantendo así un maior control sobre a súa cría e benestar.

A nosa filosofía é sinxela: respectar a natureza do Porco Celta, ofrecerlle espazo, tranquilidade e os coidados que necesita para desenvolver todo o seu potencial. Cremos que unha boa carne comeza moito antes da alimentación ou da comercialización; comeza no trato diario aos animais e no compromiso co traballo ben feito.

Máis que unha explotación gandeira, GalPorCel é un proxecto familiar que busca contribuír á conservación dunha raza única, mantendo viva unha parte importante do patrimonio rural galego para as xeracións futuras.